Zuzeu Podcastek aurkezten du: Urpeko Bonbarda, Anartz Bilbao gidari duen musika saioa.

Hamargarren saio honetan, Astor Piazzolla bandoneon jole argentinarrari monografikoa osatu diogu, 2021ko martxoaren 11n jaio zeneko mendeurrena baita.

Gure soinu txikiaren oso antzekoa omen den musika tresnarekin, tangoaren berritzaile nagusitzat jotzen da Piazzolla.

Saioan Piazzolla zenari egindako omenaldiak entzun ditugu, Los Fabulosos Cadillacs-en "Piazzolla" edo Javier Lopez Jaso soinu jole nafarraren "Un paseo con Astor". Baita Joseba Tapia eta Koldo Izagirreren "Putzu guztiek dute ondoan apoa", non aipatzen den "Piazzollak bezain triste jotzen du tangoa".

La Platako musikariaren doinurik ezagunenetako batzuk ere entzungo ditugu, Sao Paulo Ska Jazz ("Adiós Nonino"), Grace Jones ("Libertango"), Al Di Meola ("Oblivion") eta Gotan Project ("Vuelvo al Sur") artistek egindako moldaketetan. Eta jakina, baita Astor Piazzolla bera ere, bandoneonari eragiten "Buenos Aires hora zero", "Libertango" eta "Romance del diablo" kantuetan, hala bere lehen boskote bikainarekin nola bigarren zortzikote elektrikoarekin.

Faxismoak txunditu zuen musikariari buruzko saioa osatzeko, Irene Amuchasteguik idatzitako “Astor Piazzolla, el innovador del tango” artikulua izan dugu oinarri, eta Astor Piazzollaren jatorrizko kantuak hautatzen Diego Fischermanek lagundu digu.