Zuzeu Podcastek aurkezten du: Urpeko Bonbarda, Anartz Bilbao gidari duen musika saioa.

Hirurogeita bigarren saio honetan, atzera begirakoa egingo dugu beste behin, eta orain mende erdiko lan gogoangarri batzuk aurkeztu, 1972ko uzta bikaina ahotan hartuta.

Rock & Roll hirukote bikainarekin abiatu dugu saioa, oso maite ditugun Big Star taldearen debut lana, The Rolling Stones boskotearen harribitxi “Exile on Main St.” eta Deep Purple taldearen “Machine Head” aurkeztuta, azken hau rockaren historiako riff ezagunena gordetzen duena.

Folk doinuetara lerratuta, Jackson Browne kaliforniarraren izen bereko lehen diskoa aurkeztu dugu, eta Stealers Wheel bikote eskoziar ez oso ezagunen “Stuck in the Middle With You” izugarri ezaguna. Baita saioko euskal musikari bakarraren “Udaberria” kantua ere, Estitxu bakarlariak 1972ko bilduman emana, hiruzpalau Ep argitaratu eta gero. Estibaliz Robles-Arangiz, Beskoitzeko Urretxindorrarekin batera, Nina Simone handia dugu, tamalez, gaurko zerrendako emakume bakarra. Eta azken honek bezala, pianoarekin lagundu du “Satellite of Love” Lou Reed zaharrak, “Transformer”maisulanetik hautatu diogun kantua.

Barrabas espainiar taldeak AEBetan ere arrakasta erdietsi zuen 1970ean, perkusio latinoak eta funka rock sinfonikoarekin nahastuta, Santana, Osibisa eta besteri jarraiki.

Bukatzeko, soul musikaren izen handi bi. Al Green bata, “Let´s Stay Together” maitasun kanta ezaguna abestu zuena izen bereko diskoan, gerora Tarantinok “Pulp Fiction” filmaren soinu bandan gehitua; eta Stevie Wonder bestea, nerabezarotik Motown zigiluarentzako arrakastak idazteaz nekatu eta soinu propioa bilatzeari ekin ziona “Talking Book” plazaratuta, 22 urte baino ez zituela.