नवकर्तृत्वाची शोधयात्रा

फर्स्ट जनरेशन आंत्रप्रिन्योर म्हणजेच पहिल्या पिढीतील उद्योजक या विषयावर विपुल लेखन झाले आहे. अशा लोकांच्या सक्सेस स्टोरीज् आपणा सर्वांना प्रेरणा देत असतात. मात्र, दुसऱ्या पिढीतील म्हणजे `नेक्स्टजेन` मधील उद्योजकांच्या वाटचालीचा वेध घेत त्यांचा संघर्ष, त्यांचे अनुभव, आव्हानांकडे पाहण्याचा दृष्टिकोन आणि त्यांना भिडण्याचे धैर्य अशा गोष्टी आपणापुढे येतातच असे नाही. म्हणूनच प्रेरक लेखक दत्ता जोशी यांनी पुढची पिढी व त्यांच्या यशाची गोष्ट सांगण्यासाठी अत्यंत प्रयत्नांतून एक शोधयात्रा केली. `मूव्हिंग अॅस्पिरेशन्स` मधील प्रत्येक गोष्ट या नवकर्तृत्वाच्या शोधयात्रेतील एक एक टप्पा. याच संकल्पनेविषयी...

What is Moving Aspirations मूव्हिंग ॲस्पिरेशन्स... `नेक्स्टजेन`च्या २५ परिणामकारक कथा?

तुला काय कमी आहे? तुझ्या आईवडिलांनी तुझ्यासाठी हे सारे उभे करुन ठेवलेले आहे, तुला फक्त सांभाळायचे आहे...`` बोलणारा सहज बोलून जातो आणि आपल्या उद्योगातील नवनवी आव्हाने पेलणाऱ्या नव्या पिढीतील उद्योजकाच्या मनाला ती बोच लागते. आधीच्या पिढीने पाया मजबूत केलेला असतो आणि नव्या पिढीला त्यावर उत्तुंग इमारत उभी करायची असते. कसा असतो हा प्रवास? प्रसिद्ध प्रेरक लेखक दत्ता जोशी यांच्या संकल्पनेतून आणि शब्दांतून साकारलेली ही संग्राह्य यशोगाथा.